Торцида ја мрази УЕФА, Хајдук ќе плати казна

Припадниците на навивачката група „Торцида“ што го поддржуваат сплитски Хајдук, во Скопје за време на дуелот со Турново во квалификациите за Лига на Европа истакнаа транспарент „Ја мразиме УЕФА“ и уште неколку пароли со навредлива содржина, а клубот ќе мора да плати казна. Случајот е интересен бидејќи европската куќа на фудбалот им забрани на најверните симпатизери на сплитските „били“ да патуваат за Скопје, но тие пристигнаа и го бодреа Хајдук.

– Ние сме веројатно единствениот пример во историјата што ќе плати казна за однесувањето на навивачите, а притоа тие да немаат право да бидат на трибините – изјави Марион Брбиќ, претседателот на Хајдук.

Утре сплиќани играат со Дила Гори од Грузија во третото квалификациско коло, а каква казна ќе добијат од УЕФА ќе се знае на 22 август.

Тогаш веројатно ќе биде познато какви санкции ќе има и кон македонскиот првак Вардар поради инцидентите пред јужната трибина на самиот почеток од натпреварот со Стеауа, кој се одигра на 23 јули во Скопје.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.