ДПМ бара да престане лустрацијата на македонските писатели

Друштвото на писателите на Македонија по повод лустрацијата на неколку свои членови со соопштение се обрати до највисоките државни инстанци. Во соопштението на писателската асоцијација меѓу другото стои:

-Друштвото на писателите на Македонија со загриженост го следи процесот на лустрација на македонските писатели и бара да престане овој атак кој е насочен против најсветлите страници на македонската национална литература и култура. Значајни имиња на македонската писателска асицијација веќе се ставени на столбот на срамот и тоа добива димензии на свесно и тенденциозно рушење на вредностите создавани со децении и афирмирани како неодминлива вредност во земјата и во светот. Апсурдот е дотолку поголем што оваа хајка против македонските писатели покажува знаци на обид за девалвирање на вредностите врз антимакедонска основа и разнебитување на духовните и естетските дострели според кои Македонија е препознатлива ширум светот.

ДПМ, продолжува во соопштението, се обраќа до највисоките државни инстанци да постапат според нормите на правната држава и да го прекинат овој незаконски и антиуставен чин. Во спротивно ДПМ овој процес ќе го толкува како тенденција без преседан во нашата историја на апсурдно газење и рушење на темелните вредности во македонската национална култура.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.