За многу од државите на ЕУ, 2019-та е прерано за да се укине поместувањето на
стрелките на часовникот, изјави австрискиот министер за сообраќај – Норберт Хофер.
Хофер смета дека е неопходно да се најде компромис со мнозинството земји, бидејќи многу
од членките на Унијата се резервирани кога се работи за промена на системот на сметање на
времето, но и околу тоа кога тоа би се спровело.
Планот за укинување на зимското и летното сметање на времето, т.е. поместувањето на
стрелките на часовникот два пати годишно, беше претставен минатиот месец од
претседателот на Европската комисија – Жан Клод Јункер. Сега дискусијата повторно се
развива поради скептицизмот дека тоа ќе се спроведе до 2019-та, како што предложи ЕК.
Предлогот следеше откако милиони луѓе одговорија на анкетата и побараа да се укине
децениската пракса на поместување на часовникот. Истражувањата, од друга страна,
покажуваат дека истата има низа негативни ефекти врз луѓето и животните, а дека притоа не
се постигнува основата цел – штедење на енергија.
Што се однесува до Австрија, Хофер потврдува дека земјата е ЗА укинување, но потенцира
дека постојат низа прашања и проблеми кои претходно треба да бидат решени. Еден од нив
е проблемот со авиоиндустријата, го пренесува Хофер ставот на една од земјите членки, на
која ќе ѝ бидат потребни 18 месеци за да се подготви за укинувањето на сегашниот систем
на сметање на времето.
И данскиот министер за сообраќај – Оле Бирк Олесен, е скептичен дека тоа ќе се случи до
2019-та. Тој изјави дека за таква одлука претходно е неопходно да има опширна јавна
дебата, а таква во Данска сé уште не е одржана. Не е реално поместувањето на стрелките да
се укине до 2019-та, заклучува тој.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
