Побаравме 100 вработувања во ЈУ Здравствен дом Скопје, таа одлука помина на Влада и ќе продолжиме да работиме за да обезбедиме финансиските средства и со ФЗОМ и Министерството за финансии. Здравствениот дом Скопје е соочен со сериозен ризик во давањето медицински услуги, затоа што недостигаат 110, 120 вработени – доктори и останат медицински персонал. Оваа служба мораме да ја зајакнеме.
Ова денеска го истакна министерот за здравство Венко Филипче по посетата на Детската болница Козле. Тој рече дека недостига кадар и во Службата за Итна медицинска помош (ИМП), во специјалистичко консултативните амбуланти и во превентивата посебно во стоматолошката.
– ИМП располага со седум возила, што е премалку за населението на територија на градот Скопје. Недостигаат и возила за ИМП, затоа очекуваме да започне набавката на нови возила за ИМП, а капацитетот најмалку би се дуплирал. Потребни се возила и за други здравствени домови во државата, потенцира Филипче, одговарајќи на новинарско прашање.
Нагласи дека планираат дополнување на кадарот со нови вработувања и заедно со ФЗОМ работат на пресметка за тоа какви финански импликации ќе има зголемувањето на платите на лекарите специјалисти, а во таа пресметка овие колеги не се иземени.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
