Мадалена Пападопулу: Протестите го покажаа патриотизмот на Грците и желбата да не се користи терминот Македонија

Протестите ги покажаа желбата и патриотизмот на Грците, вели портпаролката на Независни Грци, партијата коалиционен партнер во грчката влада.

Мадалена Пападопулу, коментирајќи ги вчерашните собири низ цела Грција, но и најавите за нов протест во Атина, рече дека доколку навистина се одржи, таа лично ќе присуствува, како што учествувала и на минатиот во грчката престолнина.

-Протестите можат да помогнат во еден преговарачки процес. Протестите навистина го покажаа патриотизмот на Грците, душата на Грците и желбата на Грците и на Гркинките да не се користи терминот Македонија или изведените зборови за Скопје, рече Пападопулу и додаде дека на собирите имало луѓе од сите возрасти, од сите општествени степени и од различни професии.

Гостувањето во утринска информативна емисија на грчката телевизија Скај, го искористи уште еднаш да го повтори ставот на Независни Грци дека нема да поддржат име со терминот Македонија.

-Она што ние како Независни Грци велиме е дека не можеме да прифатиме употреба на име со терминот Македонија или изведените зборови за Скопје, рече портпаролката на Независни Грци,, јави дописникот на МИА од Атина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.