Утревечер, на 23 февруари, со почеток во 20 часот, во ноќниот клуб „Станица 26“ ќе настапи легендарниот британски блуз гитарист и вокалист Stan Webb. Овој ексклузивен концерт е во организација на концертната агенција и продукција “3Гонга“ и претставува Градска сесија број 10.
-Јас сум исклучително самокритичен. Кога некој ќе ми каже дека нешто што сум отсвирил е одлично, најчесто велам, „Во ред е, но сепак можев и подобро…“ на што секогаш оди коментарот „Ох, вие музичарите никогаш не сте задоволни“… јас секогаш одговорам „Па и не треба да бидам, само со изоштрена самокритика стануваш подобар, вели Стен, кој со нетрпение очекува да настапи во Скопје.
Во петок ќе имаме можност во живо да го видиме настапот на познатиот Stan Webb кој со својот бенд “Chicken Shack” оставија неизбришлива трага во историјата на британскиот блуз. Во Скопје пристигнува директно од Лондон заедно со останатите музичари.
Покрај концертниот настап, македонските љубители на блузот ќе имаат ретко задоволство да се запознаат со легендарниот гитарист, а музичарот со големо задоволство ќе им ги потпише нивните плочи.
Како млад талентиран гитарист, Stan Webb бил фасциниран од “црнечкиот” звук, особено од музичарите како Freddie King, Muddy Waters и Buddy Guy кои имаа големо влијание во градењето на неговиот сопствен музички израз кој во средината на шеесетите години го интепретира со својот состав „Chicken Shack””. Во тоа време многу звучни имиња како “Fleetwood Mac”, John Mayall’s Bluesbreakers, “Savoy Brown”, “The Yardbirds”, “The Animals”, “The Rolling Stones”, Georgie Fame & The Blue Flames,The Spencer Davis Group… (со дел од нив Stan Webb и соработувал) создаваат се уште ненадминато богато музичко наследство, инспирација за многу генерации музичари кои по нив се појавија на сцената. Во 1967 “Chicken Shack” потпишуваат договор со “Blue Horizon” и наредната година го издаваат својот прв албум нарецен “’40 Blue Fingers, Freshly Packed and Ready to Serve” кој постигнува голем успех, особено со сингловите “I’d Rather Go Blind” и “When The Train Comes Back”, благодарение на извонредната изведба, особено со гласот на Christine Perfect, која подоцна постигна светска слава како членка на “Fleetwood Mac””. Во бендот продефилираа голем број музичари, а само лидерот Stan Webb остана врзувачко ткиво и по неколку години непрекинати турнеи и свирки низ светот, Stan реши да се одмори. Таа пауза не траеше долго, па по кусо време се активира како член на познатите “Savoy Brown” што не траеше долго, за потоа да го обнови бендот, овој пат под наслов “Stan Webb’s Chicken Shack” со кој и денес успешно настапува и покажува зошто е еден од најпочитуваните претставници на британската блуз школа.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
