Со изведбата на комедијата „Од кол на кол“ во режија на Коле Ангеловски, прилепскиот народен театар „Војдан Чернодрински“ вчера вечер ја одблежа 68-годишнината од своето постоење…
Завесата на Театарот првпат се кренала на 18 февруари 1950 година со изведбата на претставата „Кир Јања” од Јован Стерија Поповиќ, во режија на Аце Михајлоски.
Прилепскиот театар, кој оставил белег во македонската драмска и театарска уметност со претстави и познати актерски имиња, во 68-те години прикажал над 370 премиери, одиграл над 7.500 претстави кои ги гледале преку 1,6 милиони луѓе.
Најголемите успеси прилепскиот театар ги постигна со претставата „Тапани во ноќта“ од бертолд Брехт, во режија на Мартин Кочовски, која се крена до димензии на бренд на македонскиот театар. Оваа претстава освои три награди на фестивалот МЕСС во Сараево (2008 година) и беше победник на 44-то издание на МТФ „Војдан Чернодрински“.
Не помалку наградувана е „Кавкаскиот круг со креда“, исто од Брехт во режија на Кочовски, која во 2011 година беше прогласена за најдобра претстава на фестивалот „ЕХ Понто“ во Љубљана, Словенија. Голем успех досега постигнаа и претставите: „Силјан Штркот”, „Кумови”, „Собирен центар”, „Туѓо сакаме свое не даваме”, „Молам за секс“, „Спиро Црне”, „Колобан”, „Арсениј” „Полковникот птица” , „Опера за три гроша” од Брехт и други претстави.
Ансамблот на прилепскиот народен театар „Војдан Чернодрински“ пред неколку години се збогати со неколку нови актерски имиња, сега брои 18 актери и е меѓу водечките во земјава кои на сцената поставуваат текстови од македонски драмски автори.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
