На овогодинешното, шесто по ред издание на меѓународниот поетски фестивал „Млади рими“ во Љубљана, Република Словенија, учесници ќе бидат и тројца поети од Република Македонија: Иван Антоновски, Марта Маркоска и Ѓоко Здравески.
Во рамките на овој фестивал, кој во моментов е една од најреномираните манифестации за млади поети во регионов, на 29 јуни, на славната „Метелкова“, Антоновски, Маркоска и Здравески ќе одржат поетска вечер на која словенечката читателска публика ќе биде запознаена со уметничките вредности на поетското творештво коешто го создаваат тие, како автори кои припаѓаат на најмладите книжевни генерации кај нас, односно како едни од авторите за кои неретко се вели дека се и нова движечка сила на современата македонска книжевност. Притоа, пред словенечката јавност, дел од нивното творештво ќе биде претставено и во препев на словенечки јазик.
Тројцата македонски поети на 1 јули ќе бидат учесници и на поетскиот маратон со кој свечено ќе биде затворена оваа значајна книжевна манифестација во Република Словенија.
Минатата година, специјален гостин на „Младе риме“ беше македонската авторка Лидија Димковска, кога и беше промовирана нејзината поетска книга „рН неутрална за животот и смртта“, во препев на словенечки јазик. Овогодинешното издание на Фестивалот е прво на кое ќе учествуваат неколку млади поети од Република Македонија. Оттаму, ова меѓународно претставување на поезијата на Антоновски, Маркоска и Здравески е уште една потврда на фактот дека младите генерации македонски автори создаваат творештво кое има потенцијал да биде репрезентативен претставник на новите македонски книжевни вредности и надвор од границите на македонската културна средина.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
