По баладата што го одбележа последното издание на „Макфест“, „Готово е“ и одличниот настап на реномираниот „Скопски фестивал“ со „Залудно е“, следно од секогаш енергичната Тамара Тодевска е исто толку енергична песна.
Со брз и остар ритам, „Само сакам да“ е дело на композиторот и продуцент Бертан Аслани, додека, пак, за текстот на новата песна се потпиша познатиот рапер Тони Зен.
За новата песна е снимен и видеоспот, кој за неколку дена ќе ѝ биде презентиран на јавноста.
Како и за „Залудно е“, таа повторно соработуваше со режисерот Владимир Дади Ивановски, кој потенцираше дека најмногу внимание му е посветено на квалитетната и врвна фотографија, како и интересните костими на Ивана Књез и Мила Кадриу и шминката на Арменд Рамадани.
Со „Само сакам да“, ексклузивката на „Горила продукција“ го најавува нејзиниот следен албум. По тој повод, в сабота, 6 јули, во летната дискотека „Колосеум“, Тамара во друштво на повеќе од 8 музичари, кои ќе ја придружуваат на сцената, ќе ја потсети публиката на нејзините најголеми хитови, како и неколку нови музички проекти.
На овој концерт како специјални гости ќе се појават нејзините долгогодишни пријатели и соработници: Тони Зен, Влатко Илиевски и Роберт Билбилов.
Влезниците за концертот по промотивна цена од 200 денари веќе се пуштени во продажба во Југотон, Камарад Растор, Цвеќара Розе Веро 2, како и сите продажни места на МК – Тикетс. На врата влезниците ќе чинат 250 денари.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
