Деновиве во издание на издавачката куќа ЕДУКА МАК од Скопје, излезе од печат првата „Македонска илустрирана енциклопедија за деца“ од авторите: м-р Ели Маказлиева, Татјана Грегова и Александра Велинова, а илустрациите се на Игор Јовчевски.
Оваа енциклопедија според својата оригиналност и единственост е прва од ваков вид во Македонија и е оригинално дело на тим македонски автори.
Рецензијата е доверена на проф. д-р Татјана Котева- Мојсовска и проф. д-р Сузана Никодиновска- Банчотовска, двете професорки на Педагошкиот факултет како и на д-р Христо Петрески- писател, поет, есеист и книжевен теоретичар.
Енциклопедијата има за цел да ја поттикне љубопитноста и интересот кај децата и првенствено е наменета за деца од 5 до 10 годишна возраст, но има можност да ја користат сите деца и помалите и поголемите.
Содржините на ово уникатно дело има за цел и да обезбеди влијание врз формирањето на сликата за себе кај децата , како и врз создавањето и негувањето на чувството на припадност и идентитет.
Дотолку повеќе што ракописот е создаден од автори кои ги познаваат детските развојни карактеристики и потреби.
Во неа се обработени 39 тематски содржини кои даваат основни информации за татковината Република Македонија, за нејзините убавини како и позначајни податоци прилагодени на возраста на детето.
Оригиналните илустрации на неверојатен начин ги презентираат содржините како неизоставни елементи кои ќе го дооформат впечатокот на енциклопедијата.
Идејно-концепциската и содржинската структуираност од попросто кон посложено дава посебен белег за приемчивост и достапност за децата, дополнувајќи го дефицитот на литература од ваков вид кај нас и создавајќи драгоцен придонес во литературата за деца.
„Почитувајќи ја идејата на авторката м-р Ели Маказлиева, да се направи едно вакво дело како и на нејзината долгогодишна и целокупна пишувачко-педагошка работа во областа -литература за деца и млади, сметам дека со ова дело е направен многу сериозен но одличен обид да се создаде ваква книга – енциклопедија за деца, создадена со мајсторство, многу оригинална, уникатна и дефицитарна…“ – меѓу другото во својата рецензија напиша Христо Петрески.
Промоцијата на првата „ МАКЕДОНСКА ИЛУСТРИРАНА ЕНЦИКЛОПЕДИЈА ЗА ДЕЦА“ ќе биде промовирана денес, петок 22.12.2017 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
