Краткометражниот филм „Крајот на времето“, кубанско-американска копродукција во режија на Милчо Манчевски, освои две награди: за најдобар ненаративен филм на Берлинскиот фестивал на експериментален филм и награда на фестивалот „Алтернативи“ во Белград.
Во своето образложение за наградата жирито во Берлин наведува дека „кристалниот минимализам и супериорната едноставност на филмот се навистина потресни”. Белградското жири, пак, во образложението истакнува дека „филмот има визуелен магнетизам, формално е заокружен и одлучен, со јасен став и очигледно занаетско мајсторство”.
„Крајот на времето“ претходно освои награда „Елен“ на фестивалот на краток филм во Аспен, Колорадо, како и награда на чешкиот фестивал на документарен и експериментален филм во Јихлава.
Манчевски го сними „Крајот на времето“ минатата година во Куба, каде што гостуваше како професор на државната филмска академија, а постпродукцијата ја заврши во Њујорк.
Филмот досега беше претставен на триесетина фестивали и во неколку галерии низ светот. Во Македонија премиерно беше прикажан на фестивалот „Браќа Манаки“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
