По повод 110-годишнината од обновувањето на храмот „Свети Никола“ во Крушево, утре со почеток во 18 часот камерниот хор „Херувими“ од Скопје ќе одржи концерт на кој ќе бидат изведени црковни творби од византиската традиција од македонски автори.
Камерниот хор „Херувими“ е единствениот хорски ансамбл во нашата земја кој на својот репертоар негува и изведува творби од псалтикиите на црковно-музичките творци од Македонија, при што го негува традиционалниот македонски идиом, а со својата активност творбите од многуте ракописи и печатени книги на црковно пеење од словенско-византиската традиција настанати на територијата на Македонија ја доживуваат нивната изведба како значаен придонес кон истражувањето, зачувувањето и афирмирањето на ова непроценливо национално културно наследство.
На пригодната свеченост беседа за историјата и културното значење на храмот „Свети Никола“ ќе одржи Кочо Топузоски.
Инаку, храмот „Свети Никола“ во 1907 година е обновен врз темелите на претходниот храм посветен на истиот светец, заштитникот на Крушево, кој до темел е разурнат од отоманската војска, ноќта на 12 спроти 13 август 1903 година при падот на Крушевската република.
Одбележувањето на оваа годишнина е во организација на Центарот за византолошки студии при Универзитетот „Евро-Балкан“ од Скопје и Здружението за уметност и култура „Арт-кул“ од Крушево.
извор:Макфакс
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
