Краткометражниот филм „Борба за смрт“ е селектиран да учествува на четири интернационални фестивали кои ќе се одржат во текот на октомври, информираат од продукцијата „ДНФ филмс“.
„Борба за Смрт” работен во режија и по сценарио на Елеонора Венинова. Во филмот главните улоги се Мите Грозданов и Илија Струмениковски,, а продукцијата е на ДНФ филмс“.
Филмот ќе ја има својата африканска премиера на Медитеранскиот фестивал за краток филм во Танџиер, Мароко, а во исто време ќе се прикажува во официјална конкуренција на Интернационалниот филмски фестивал во Ханченг, Кина. Филмот е селектиран и на фестивалот „kurz.film.spiele“ во Констанц, Германија, а „Борба за смрт“ е дел од селекцијата на македонски филмови кои ќе се прикажат на фестиалот „Sedicicorto“ во Италија.
– Се радуваме што со премиерата во Мароко достигнавме една цел која си ја поставивме на почетокот – филмот да учествува на фестивали на секој континент во светот – велат од продукцијата.
Во меѓувреме, „Борба за смрт“ освои уште една награда за најдобар краток филм-комедија на фестиалот Balkan Film & Food Festival, кој се одржа во Поградец, Албанија. Ова е трета меѓународна награда за филмот после наградата „Златна мачка“ за на Филмскиот фестивал за краток филм во Измир, Турција и награда за Најдобра машка улога на Интернационалниот фестивал за краток филм во Драма, Грција.
„Борба за смрт“ досега учествуваше на триесетина фестивали ширум светот, вклучувајќи голем број на фестивали кои се квалификациски за БАФТА, Оскар и Европските филмски награди.
Парадоксалната драма во која двајца старци се расправаат за последното гробно место во едно запустено македонско село се снимаше минатото лето во мариовското село Кален. Сценариото и режијата се на наградуваната македонска филмска авторка Елеонора Венинова, продуцент е Гоце Кралевски од ДНФ филмс. Во улогата на двајцата дедовци се актерите Мите Грозданов и Илија Струмениковски, а директор на фотографија е Димо Попов. Филмот е финансиран од Агенцијата за филм во соработка со Канал 5 телевизија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
