Изгаснат пожарот во депонијата во Струга, решението е итна дислокација

Пожарот во струшката дива депонија е изгаснат, а со помош на расположливата градежна механизација на неколку компании се врши конзервација на отпадот. Градоначалникот Мустафа Забзун вели дека граѓаните на Струга веќе не треба да стравуваат, бидејќи ситуацијата е комплетно ставена под контрола.

-Никогаш не сум ја сакал оваа депонија и ќе настојувам со сите мои капацитети да не се носи смет во депонијата Ќе ја дислоцирам на 30 км од градот, изјави Мустафа Забзун, градоначалник на Општина Струга.

Во следните денови депонијата ќе биде под постојан надзор, за да се спречи некој повторно да ја потпали. Од министерството за животна средина најавија дека доколку има потреба од дополнителни мерки ќе се постапи согласно ситуацијата од терен.

Од ВМРО ДПМНЕ велат дека само гаснењето и тампонирањето нема да го решат проблемот со депонијата и бараат итна дислокација, поради опасноста наталожениот отпад да ги загади подземните води кои се влеваат во Црн Дрим и Охридското Езеро.

Доколку не се исполнат нивните барања, тие најавуваат протести и блокирање на дел од патните правци.

За идната недела, протести за затворање на депонијата и носење на сметот на друга локација најавуваат и голем број на граѓански здруженија од Струга.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.