Синоќа на сцената на Македонскиот народен театар (МНТ) се прикажа претставата „Дон Жуан“ на бугарскиот театар „Иван Вазов“. Одличната претстава чиј режисер е Александар Морфов, за жал, публиката која беше дојдена да ја гледа, не можеше да ја следи, најмногу поради однесувањето на дел од гледалиштето.
Меѓу публиката беше и актерот Сашко Коцев. Тој упати апел до театарската публика, за начинот на кој треба да се однесува кога посетува театарска претстава.
Тој потсети оти користењето на мобилните телефони и разговорите во текот на текот на претставата, како и доцнењето при доаѓање во театар, се меѓу најчестите причини кои им пречат на актерите, како и на останатите присутни гледачи.
– Актерите на сцена се преправаат дека никој не ги гледа, а публиката скришно, воајерски ѕирка, како низ прозорчиња, и се преправа дека не е тука, за ние да можеме да ја донесеме магијата наречена театар. Таа магија се остварува кога ние ќе заборавиме дека некој н гледа, а кога публиката ќе заборави дека ѕирка. Тоа е бесценетиот момент заради кој излегуваме егзалтирани после претставата. Сето ова го рушат сите ѕвонења и јавувања на мобилни, сликање со блиц, довикувања, разговори, влегување 20 минути подоцна, носење тригодишни деца на вечерна претстава. Овие работи веднаш не враќаат во реалноста… И вас и нас – напиша Коцев, додавајќи дека сите вакви вознемирувања повеќе го нервираат како гледач на претстава, отколку како актер.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
