Груевски на увид во изградба на автопатот Кичево-Охрид (Фото)

Увид во работите на автопатот, односно во делот на пробивањето на тунелот кај Пресека, денеска изврши лидерот на ВМРО-ДПМНЕ Никола Груевски кој од министерот за транспорт и врски Владо Мисајловски беше информиран дека е пробиена речиси 95 проценти од трасата.

Мисајловски посочи дека во моментов се работи на повеќе точки од автпопатот за што се ангажирани четири различки компании, а тунелите кои претставуваат најтешкиот проект од изградбата на автопатот ги работи кинеската компанија „Синохидро“.

– Изградбата на автопатот ќе значи многу за цела западна Македонија за луѓето кои патуваат од Скопја за Охрид и обратно, но ќе значи многу за охриѓани, стружани и за целиот регион. Ова беше и наше ветување кон граѓаните, а сега еве овој пат е веќе половина завршен, рече Груевски.

Мисајловски информираше дека во момемнтов се ангажирани над 1100 работници, а бројот ќе расте до 1500 согласно со градежната сезона, и дека се асфалтирани и шест километри од патот. Посочи и дека со зацртаната динамика автопатот треба да биде готов во првата половина од 2019 година.

Градоначалникот на Охрид Никола Бакрачески истакна дека изградбата на овој автопат е од круцијално значење воопшто за Охрид за развој на туризмот, но и за економски развој на општината.

Предвидено е изградба на осум клучки со што ќе се овозможи вклучување и исклучување на автопатот. Овие клучки се договорени во разговори и по барање на локалното население, а за нивната изградба, како што посочи министерот, ќе бидат обезбедени средства од Јавното претпријатие за државни патишта.

Според Програмата на Владата, по завршувањето на автоипатот Кичево – Охрид ќе почне изградба на автопатската делница Гостивар – Кичево. Во меѓувреме, информираше Мисајловски, завршен е тендерот за реконструкција на стариот пат Гостивар – Кичево преку Стража, која ќе ги опфати и сите мостови на таа делница.

– Автопатот Гостивар – Кичево, за чија изградба се доработува проектот, е тежок терен за градба. Откако ќе биде завршена проектната документација, ќе се обезбеди финансирање и ќе почне да се гради. Овие два автопата заедно со патот Гевгелија – Демир Капија, долг 29 километри, се едни од најтешките делници за градба, рече Груевски.

Изградбта на автопатот Кичево – Охрид почна во февруари 2014 година и е еден од најголемите проекти во последните 50 години во Македонија. Автопатот е со широчина од 26 метри, а предвидена е изградба на седум мостови, 22 вијадукти, шест натпатници, 13 потпатници и еден тунел кај Пресека со должина од околу два километра.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.