Груевски: Изградени се 74 нови и реконструирани се 400 училишта

Седумдесет и четири нови училишта се изградени во земјава, а 400 се реконструирани од 2006 година, откако ВМРО-ДПМНЕ ја презеде власта. За годинава е планирана изградба на четири нови и реконструкција на 26.  Инвестицијата е над 50 милиони евра.

Ова го истакна лидерот на ВМРО-ДПМНЕ, Никола Груевски, денеска при посетата на ново повеќенаменско игралиште во близина на Подрачното основно училиште „Круме Кепески“ во општина Кисела Вода.

Тој додаде дека за годинава се планирани изградба на четири нови училишта. Тоа се училиштата ОУ „Вера Јоциќ“ во Хиподром, општина Гази Баба, ОУ „Димитар Македонски“ во општина Аеродром и доградба на ОУ „Кирил и Методиј“ во село Фалиште, општина Тетово. Четвриот објект што е планиран да се изгради е во населеното место Визбегово.

Груевски појасни дека средствата се обезбедени и оти за три е завршена тендерската постапка и потпишани се договорите. Градбата треба да почне во наредните денови или недели, а за една до две недели треба да се потпише договорот и за четвртото училиште што е планирано за оваа година.

Во однос на реконструкцијата на 26-те училишта посочи дека парите се обезбедени во буџетот, тендерските постапки за најголем дел се завршени, а некаде се почнати градежните зафати, но некаде се очекува да почнат во текот на летото.

– Она што беше планирано во програмата ќе се исполни – рече Груевски.

Реконструкцијата е завршена во  ОУ „Маршал Тито“ во струмичко Муртино,  „Ибрахим Темо“ во Струга и „Кирил и Методиј“ во Велес, а за останатите се очекува да почне во текот на летото за да не се попоречува наставата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.