Колумнист: Горан Момироски
Еврокомесарот за проширување Јоханес Хан предоцна се сети да предупреди дека некои луѓе од западниот Балкан, кои патем немаше храброст да ги именува, можат да го турнат регионот во хаос. Австрискиот еврокомесар е разочаран и изнервиран од Еди Рама и од неговите пајташи, кои повикуваат на војна во регионот. Изјавата на Хан ќе беше одговорна и наместо доколку беше дадена пред два месеца кога почна воинствената реторика на Рама и на другарите: Вака и Хан и Европската унија ни ја прикажаа уште еднаш својата лицемерност затоа што се изнервираа и разочараа дури тогаш кога беа директно спомнати. Дури откако албанскиот премиер без ракавици ги уцени дека ако нема влез на Албанија во ЕУ, тој ќе иницира обединување со Косово и создавање на Голема Албанија.
Ниту Хан, ниту неговите шефови, ниту идеолозите на европската и на американската политика како доминантни фактори во регионот не се изнервираа кога Рама директно интервенираше во внатрешните работи на Македонија со испишувањето на тиранската платформа под мапата на Голема Албанија во неговиот кабинет. Ниту Хан, ниту некој друг во ЕУ не реагираше кога Бујар Нишани во Бујановац организираше сеалбанска прослава на која немаше никакви српски симболи, уште помалку српска химна. Јасно е дека на немоќниот австриски политичар во Европската комисија му е тешко директно да ги осуди Албанија и албанските националисти во регионот затоа што како функционер во Брисел точно знае дека Албанија е слабост на европската и на американската дипломатија.
Нему му е кристално јасно дека ако на оваа тема молчи неговата шефица Федерика Могерини, која е вицепретседателка на ЕК и одговорна за надворешните и безбедносните прашања, тогаш приказната е многу посложена. Настрана тоа што Могерини е со иста идеолошка матрица како и Рама, настрана што Албанија во европски рамки се смета за протеже на официјален Рим, очигледно е дека храброста на албанските политичари да им пркосат на сите соседи и на ЕУ има многу посилна заднина. Која и да е таа заднина, меѓународната заедница, пред сѐ САД, ЕУ, Германија, Франција, Британија, мора да знае дека ако јасно и гласно не ги запре повиците за менување на границите, ќе биде директно виновна, а еден ден и судена, за поттикнување нов хаос на Балканот.
Лажниот оптимизам на лажните албански патриоти
Да се зборува за воени сценарија на Балканот длабоко влезени во втората деценија од 21 век е грев и срам за глобалните лидери, но реториката на албанските воинствени лидери ни дава право и на таква анализа.
И, навистина, што е тоа што ги тера Рама, Тачи, Муслиу, Села и другите албански политичари, кои досега се обидуваа да се дистанцираат од радикалите што отворено се залагаа за Голема Албанија, да влезат во воена приказна. Дали е тоа порастот на БДП на Албанија за 2016 година, кој е 3,6 проценти и е највисок во регионот, но, сепак, не е доволен за западниот сосед да издржи поголема поплава, а не војна со сериозни противници како Србија, на пример. Дали е тоа огромниот наталитет на албанските територии на Балканот каде што, според Тирана и Приштина, живеат повеќе од 7 милиони Албанци, а реално ако се пресметаат сите имигранти и реалниот природен прираст, ќе се дојде максимум до половина од таа бројка?
Или, можеби, е моќната албанска дијаспора во САД и во Европа, која може да собере илјадници доброволци и милиони евра за купување оружје со кои, меѓу другите, ќе гинат и албански синови и ќерки. Од другите сценарија, можно е да се работи за ветувања од странски ментори кои гарантираат дека ако Албанија со обединување на Косово предизвика војна, ќе ги оствари своите интереси и идеали за сите Албанци во една држава.
Идиоти имало и ќе има
До каде отиде реториката на Рама и какво погубно влијание може да има тој врз налудничавите радикали во регионот покажува примерот со претседателот на Собранието на општина Бујановац, Јонуз Муслиу, кој според српските медиуми изјавил дека Рама на Албанците во Јужна Србија им ветил дека Прешевска Долина ќе биде припиена кон Косово и Албанија. Тој тврди дека Албанците на југот на Србија имаат поддршка од Рама за уривање на уставниот поредок на Србија и дека зад сето тоа се крие проектот за создавање Голема Албанија. Муслиу, кој во 2000 година беше помилуван од српските власти за учество во напади на српски војници и полицајци, сега најавува трета балканска војна во која, според него, ќе горат Србија, Македонија, Грција и Црна Гора. Да беше Рама умерен и вистински лидер на својата држава, ќе беше првиот што ќе ги демантираше зборовите на Муслиу и ќе го осудеше повикот за нова војна. Но, Рама одбра да молчи и да признае дека воинствената реторика не е само предизборна кампања, туку и можен реален план.
Во војна ќе гинат сите, а не само тие што сте планирале
Сите претходно наведени албански лидери не се до толку глупави да не сфатат дека сценариото во кое Албанија и Косово ќе почнат војна и истата ќе ја победат е апсолутно нереално. Точно е дека дел од западните лидери, меѓу кои и Ангела Меркел и поранешниот британски премиер Тони Блер, кој сега е советник на Еди Рама, не веруваат во мултикултурни држави. Точно е и тоа дека западните сили можат во даден момент во евентуална војна „сите против секого“ во регионот да интервенираат и да испишат линии на разграничување кои би ги формализирале етничките граници во регионот и потоа би станале трајни. Точно е и тоа дека со една војна со лимитиран карактер, која би била искористена за редефинирање на државните граници во регионот во согласност со етничките мапи, можеби би се решиле голем дел од европските проблеми, но во исто време би се отвориле уште десетина нови. Војната во Босна најдобро ни покажа дека на Балканот нема можност од етнички држави, освен ако воените планери не планираат да извршат геноцид на повеќе народи или на делови од народи. И, навистина, како може некој да испланира граница меѓу Струга и Охрид, на пример? Што ќе се случи со Албанците во Охрид и со Македонците во Струга во таков случај, да не зборуваме за Турците, Торбешите, Ромите и за другите заедници што живеат на овој потег. Си ја чукнал ли главата Рама за да размисли што ќе се случува во јужна Албанија, во градовите каде што живее мнозинско грчко население.
Медиум близок на Вучиќ објавува извештај на ЦИА за војна на Балканот
Српскиот весник „Информер“, кој важи за медиум под директна контрола на српскиот претседател Александар Вучиќ, деновиве објави делови од извештај од американските тајни служби во кој пишува дека во наредните 12 месеци може да дојде до распад на НАТО и до општа војна на Балканот. Според извештајот, сценариото е дека Албанците во обид да создадат Голема Албанија, ги напаѓаат Србија, Македонија и Црна Гора, по што Хрватите и Босанците ја напаѓаат Србија, а Грција и Бугарија ѝ помагаат на Србија. Во наводниот извештај на ЦИА, кој е доставен до американската амбасада во Белград, а го објавува провладиниот српски медиум, се наведува дека Русија директно ќе се вклучи во конфликтот со доставување оружје за Србија. Колку и да е овој извештај фантастичен и „измислен“ во пропагандните ќелии на српските тајни служби, сепак дава јасен патоказ што сѐ може да се случи ако Вашингтон или Берлин не ги смири Рама и неговите авантуристи затоа што воени Албанија и Косово не ѝ се ни до колена на сѐ уште силната српска армија, која штотуку потпиша договор со Русија за набавка на оружје. Бездруго и навидум слабите Македонија и Црна Гора, како што се наведува во извештајот, би биле цел на координиран напад поврзан со проектот „Голема Албанија“.
А, мислевме дека налудничавите сценарија останаа зад нас
Притоа сите треба да знаат дека останатите земји го регионот, во прв ред Србија, Македонија, Црна Гора, но и Грција и Бугарија, нема да седат со скрстени раце. А, на албанските лидери мора да им е совршено јасно дека линиите на разграничување, дури и ако на страната на Албанија застане и шестата флота, не можат да ги вклучат сите Албанци, односно дека можат да вклучат и национални малцинства на други земји на територијата на Албанија. Колку и да се овие редови налудничави, Рама и другарите мора да ги знаат, мора да им е јасно дека не само Албанија и Косово, туку и целиот регион ќе паднат во бездна доколку продолжат со своите закани, уцени и конкретни дејства што би иницирале војна на Западен Балкан. Рама и неговите патриоти ги знаат овие работи и затоа е уште почудно зошто ниту запираат со воената реторика ниту, пак, некој им воведува санкции за повиците за војна.
Лирим Јакупи-Нацист
Најдобар пример како функционира меѓународната заедница кога е во прашање албанскиот фактор е озлогласениот Лирим Јакупи-Нацист, човекот кој е присутен во Македонија од 2004 година кога заедно со Агим Красниќи со месеци го држеше во заложништво селото Кондово, а на половина час пред акцијата на македонските безбедносни сили во тетовското село Бродец во 2007 година доби повик од западна локација и ги остави своите другари да се борат и да загинат во престрелката со македонските специјалци. Јакупи, кој на Косово, во Србија и во Македонија има извршено низа сериозни кривични дела (убиства, киднапирања, изнудувања), никогаш не е екстрадиран во земјите што го бараат. Во 2009 година, како осуденик на 40-годишна казна затвор, под чудни околности успеа да избега од затворот „Дубрава“ во Приштина, а сега, според официјалните косовски институции, се наоѓа во домашен притвор, што во превод значи дека тој, и покрај сиот криминал и човечки животи на своја сметка, практично е на слобода. Примерот со Јакупи е најдобра мотивација за сите млади Албанци во сегашната ситуација да ги следат зборовите на Рама, Тачи, Муслиу, Села и да влезат во филмот на „ослободители од словенските окупатори“ и така да предизвикаат војна во регионот, а притоа да не се грижат за својата иднина затоа што ќе бидат заштитени од „господарите на војната“. Речиси е извесно дека ниту меѓународната заедница на Косово ниту во земјите каде што се диригираат политичките и безбедносните процеси на Западниот Балкан нема решение за овој вид проблеми. Или уште полошо, некој поттикнува и помага вакви сценарија. Неколку балкански медиуми во минатото посочуваа дека Јакупи бил соработник на повеќе балкански и европски разузнавачки служби и дека затоа сега е амнестиран за своите недела.
(Текст објавен во 243. број на неделникот Република, 28.04.2017)
Ставовите искажани во рубриката Колумни се лични ставови на авторите и не се автоматски и ставови на редакцијата на Republika.mk. Редакцијата на Republika.mk се оградува од ставовите во објавените колумни, а одговорноста за изнесеното во нив е исклучиво на авторот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
