Македонската филхармонија вечерва ќе изведе симфониски концерт насловен „Гласот на славејот“ под диригентство на Даниел Рајскин од Русија, на кој како солист ќе настапи сопранот Милена Арсовска – меѓу најистакнатите македонски вокални уметници со успешна меѓународна кариера.
Филхармонијата најави дека првпат на македонската музичка сцена ќе биде изведено делото Три песни за сопран и оркестар од аргентинскиот современ и мошне влијателен композитор Освалдо Голијов, кој е познат по својата музичка хибридност – комбинација на традиционалната камерна музика, еврејските литургии и музиката клезмер со примеси на новото танго на Астор Пјацола.
Премиерно Филхармонијата ќе го изведе и делото „Хипнагогија во Тулијанум“ на младиот македонски композитор Никола Крстевски, кое ја освои првата награда на конкурсот на Министерството за култура во 2015 година.
На концертот „Гласот на славејот“ ќе биде изведена и Симфонија бр. 5 оп. 55 во б-мол „Херојска“ од рускиот композотор Александар Глазунов која е опишана како „прекрасна архитектонска поема“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
