Брејк за Фенербахче во грчкиот пекол, ЦСКА се намачи против Басконија

Фенербахче значитечно си ги зголеми шансите за пласман на фајналфорот од Евролигата откако тимот на нашиот Перо Антиќ вечерва славеше на гостувањето против Панатинаикос со 58-71, одземајќи му ја на грчкиот тим предноста ан домашниот терен во оваа четвртфинална серија. Иако против себе ја имаа традицијата која велеше дека ги загубиле последните десет меча на гостински терен против ПАО, кошаркарите на Фенер одиграа фанатична одбрана, неутрализирајќи ги главните оружја на противникот и на крајот заслужено радувајќи се на победата.

Успехот е уште поголем ако се знае дека Панатинаикос доминираше во првото полувреме, а грчкиот состав на почетокот од третата четвртина имаше и огромни 16 поени предност (44-28). Тогаш избраниците на Жељко Обрадовиќ влегоа во ритам, најпрвин ја стопија предноста на противникот, за потоа со фанатична одбрана во последниот период (пет примени поени во првите осум минути) и самите да стигнат до двоцифрена позитива, за конечен триумф од 58-71.

Перо Антиќ мина на теренот само две секунди, а најефикасни кај Фенербахче беа српските репрезентативци Богдановиќ со 23 и Калиниќ со 16 поени.

ЦСКА во неколку наврати во првата и во третата четвртина имаше двоцифрена предност, но Басконија со извонредна игра во нападот успеваше да се врати. Гостите на две минути до крајот имаа предност од 88-90, но Теодосиќ со тројка го сврте резултатот во полза на европскиот првак. Следеше загубена топка на Ларкин и лесна реализација на Де Коло, по што Басконија не ги реализираше и следните два напади, па поради очајниот финиш го загуби овој натпревар.

Теодосиќ со 22 и Де Коло со 17 поени беа најефикасни кај ЦСКА Москва, додека прв стрелец на Басконија при вечерашниот пораз беше Ларкин со 17 поени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.