Општина Центар се изживува врз граѓаните на Скопје: Катната гаража готова, Жерновски не дава употребна дозвола (ГАЛЕРИЈА)

Катната гаража „Смилевски конгрес“ веќе два и пол месеца е готова и се чека само на издавање употребна дозвола за нејзино официјално пуштање во работа. При нејзината градба бевме присилени трафостаницата да ја преместиме заради безбедност и сѐ уште немаме добиено одобрение од Општина Центар, информира директорот Цветко Грозданов на АД за станбен и деловен простор при денешниот увид во градежните активности заедно со лидерот на ВМРО-ДПМНЕ, Никола Груевски.

Катната гаража се простира на површина од околу 6.000 квадратни метри, има 169 паркинг-места и деловни простории од околу илјада квадратни метри. За нејзината изградба се вложени 4,5 милиони евра. Опремена е со најсовремен видеонадзор, а наскоро ќе бидат поставени и паркомати преку кои ќе може да се плаќа паркингот со пари или картичка, а ќе има и специјална служба каде што граѓаните на кои им е потребно ќе може да добијат потврда за платена сметка или, пак, да ја платат сметката доколку не се во можност  да го направат тоа преку паркоматот.

– Задоволен сум што катната гаража „Смилевски конгрес“ наспроти Македонскиот народен театар е веќе завршена, но за жал два и пол месеци чекаат од Општина Центар да добијат употребна дозвола и не знам зошто се одоговлекува и дали станува збор за политички или технички мотиви. Се надевам дека Општина Центар ќе си ја заврши својата задача зашто илјадници граѓани секојдневно ќе ја користат оваа катна гаража која е во строгиот центар на градот, изјави Груевски.

Тој истакна дека преку проектот на Владата за изградба на катни гаражи заедно со Град Скопје веќе се реализирани 6 катни гаражи во централното градско подрачје и е реконструирана подземната гаража под МОБ.

– Шест катни гаражи се завршени, а седмата што беше во план беше стопирана од новото раководство на Општина Центар. Заедно со подземната гаража под МОБ која има капацитет од 600 места во најголема мерка е решено прашањето на паркирање на возилата во строгиот центар на Скопје – рече Груевски и додаде дека некои приватни компании изградија или градат катни гаражи во централното градско подрачје.

Искористеноста на катните гаражи, како што посочи, се движи од 80 до 90 отсто.

– Можам да кажам дека проектот на Владата заедно со градот и со Општина Центар во времето на Тодоровиќ се заокружува. Добрата искористеност на катните гаражи покажува дека постоела голема потреба за нивна изградба и дека беше неоправдана критиката кон Владата дека тоа не е приоритет во моментот. Не може центарот на метрополата да остане без места за паркирање и луѓето да паркираат по плоштади, паркови и тротоари – потенцира Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.