Со култниот филм „Евтини приказни“ од Квентин Тарантино на 15 март во Кинотека на Македонија почнува циклусот „Филм на 35 мм“.
Според програмата, ќе бидат прикажани и „Реквием за еден сон“ на Дарен Аронофски, в четврток, 16 март, како и „Господин Верду“ на Черли Чаплин, в петок, 17 март.
Во 1994 година „Евтини приказни“ ја доби „Златната палма“ во Кан, а потоа забележи огромен комерцијален успех во светот. Сметан за ремек-дело на Тарантино, особено заради сценариото, дијалозите, цитатите.., филмот е речиси секогаш вклучен во некаква топ-листа на „најзначајни“, „највлијателни“ наслови во филмската историја.
„Реквием за еден сон“ е екранизација на легендарниот роман на Хјуберт Селби, а Елен Брстин, за ликот на Сара во филмот, собра многу награди.
„Господин Верду“ е од 1947 година, а маестралниот Чаплин не е само режисер и сценарист на филмот, туку, вообичаено, се појавува и во главната улога.
Трите ремек-дела на светската кинематографија ќе бидат репризирани, „Господин Верду“ на 18 март, „Евтини приказни“ на 21 и „Реквием за еден сон“ на 27 март. Сите проекции се со почеток од 20 часот.
По „Филм на 35 мм“, Кинотеката го најавува циклусот „Месечна доза шведски филм“, од 22 март.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
