Потрагата по исчезнатото двегодишно девојче од кичевското село Кленоец трае веќе 12 часа и сè уште нема никаква трага од него. Од охридската полиција велат дека девојчето исчезнало вчера додека се движело пеш со вујко му кон селото Извор. Портпаролот на СВР Охрид, Стефан Димовски, информира дека потрагата по девојчето трае од вчера од 21 часот, а во неа се вклучени полицајци и месното население. Се пребарува теренот од селото Извор до селото Кленоец. Родителите пријавиле дека нивното дете е исчезнато вчеравечер во 20:50 часот.
Портпаролот на СВР Охрид вели дека, според пријавата, девојчето исчезнало вчера попладне додека се шетало со својот вујко.
- Според пријавата, девојчето, заедно со нејзината малолетна сестра и вујко им, вчера тргнале пешки, по локалниот пат кон Извор. Кај местото викано Јарболот, вујкото забележал дека девојчето го нема. Тој неколку часа ја барал и потоа отишол во куќата на девојчето да провери да не случајно тоа се вратило дома. Потоа родителите пријавиле дека нивната ќерка под неразјаснети околности исчезнала – изјави Димовски.
Потрагата по детето е во тек.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
