Лоша вест од Австрија

Австрија има намера да ја намали висината на детските додатоци што ги примаат децата на странските работници чии семејства не живеат во Австрија и да ги прилагоди на стандардот на земјите во кои живеат, објавија во вторник словенечките медиуми.
Предлог законот што оваа недела во парламентот ќе го поднесат двете најмоќни австриски партии, Народната партија ОеВП и социјалдемократите СПО, кои ја сочинуваат владејачката коалиција, предвидува дека на тој начин би дошло до заштеда од 100 милиони евра во државниот буџет.

Висината на детските додатоци за странците би се прилагодила според животните услови и стандардот на земјите од кои доаѓаат работниците, објави словенечката агенција СТА.

Најмногу пари на име „детски додаток“ гастербајтерите лани од Австрија одвлекле во Унгарија, 65 милиони евра, следат Словачка со 60 и Полска со 37 милиони евра, а доста детски додатоци се испраќаат во Романија, чешка и Словенија.

Австрија годишно за детски додатоци исплаќа 3,4 милијарди евра, а со намалувањето на овој додаток за децата на странците, трошоците би се намалиле за околу 100 милиони евра бидејќи детските додатоци во земјите од каде што доаѓаат работниците се значително пониски.

Во земјите од кои има најмногу гастербајтери, детскиот додаток се движи од 20 до 40 евра, додека во Австрија тој изнесува од 110 до 160 евра, објави СТА.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.