Заврши долгата низа на победи на Црвена Звезда, Ефес Пилсен ја декласираше среде Белград

На серијата од седум победи на Црвена звезда во Евролигата вечерва и дојде крајот, откако шампионот на АБА-лигата неочекувано лесно и убедливо загуби на домашен терен од Анадолу Ефес со 72-86. „Црвено-белите“ во овој меч влегоа мачејќи се со бројни проблеми со повредите, што се одрази врз нивната игра и беше искористено од страна на одличниот турски прволигаш, кој одигра одличен меч и на крајот заслужено дојде до победата.

Како пресуден се покажа фуриозниот финиш на првото полувреме, во кое Ефес со извонредна игра во нападот во последните неколку минути на одмор замина со 36-47. Потоа избраниците на Перасовиќ ја стартуваа и третата четвртина со серија од 0-7, уште повеќе зголемувајќи ја предноста. „Црвено-белите“ конечно одиграа квалитетна одбрана, седум минути не дозволувајќи му на противникот да постигне поени, но разликата се спушти само на шест поени. Ефес во вистински момент се разбуди, па со одлична игра во четвртата четвртина повторно стигна до убедлива позитива, што на крајот изнесуваше конечни 14 поени разлика.

Како пресуден се покажа очајниот шут од далечина (3/16) на белградскиот состав, наспроти далеку попрецизните обиди за тројка на гостите од Турција (9/24). Браун со 20 и Данстон со 16 поени беа најефикасни кај Ефес, а одличен беше и Ертел, кој ја искористи повредата на Јовиќ и доминираше при организацијата на нападот на својот тим, реализирајќи 12 поени и 15 асистенции. Кај Црвена звезда најефикасен повторно беше Симоновиќ со 17 поени, пред Џенкинс со 13.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.