Молебен на гробот на свети Кирил во Рим

„Македонија во чест на Свети Кирил“ продолжува во Рим. Денеска ќе се одржи молебенот на гробот на свети Кирил во базиликата „Сан Клементе“, а со службата ќе чиноначалствува митрополитот Преспанско-пелагониски г. Петар. Потоа македонската делагација ќе биде примена од папата Франциско. Претседателот на Собранието Вељаноски и собраниската делегација ќе се сретнат со државниот секретар на Светата Столица, кардиналот Тарчисио Бертоне.

Поклонението на гробот на Свети Кирил во Рим е централниот настан во чествувањето на Денот на просветителите Кирил и Методиј. Првпат е организирано во 1969 година за 1100 години од смртта на свети Кирил и оттогаш секоја година на 24 Мај се одбележува со највисоки почести од црковно-државна делегација. Традиционално, 24 Мај беше Ден само на образовните институции и просветните работници, а од 2007 година тој е и државен празник на Република Македонија.

– Република Македонија и годинава ја продолжува традицијата на чествувањето на сесловенските просветители Кирил и Методиј во Рим, славните рамноапостоли проповедници на Христовата наука, просветители, учители, преведувачи на Светото писмо и други свети книги на јазикот на нашите прадедовци, посочи Претседателот на Собранието Трајко Вељаноски во Рим на отворањето на манифестацијата „Македонија во чест на Свети Кирил“.

– Република Македонија е позната по верската толеранција и почитувањето на различностите. Како дел од манифестацијата, вечерва уште еднаш ќе покажеме дека преку културното творештво даваме придонес во европската и светската култура и културно наследство, рече претседателот на Собранието.  Преку културата, истакна тој, работиме на зачувување на културниот и националниот идентитет на другите етнички заедници кои живеат во Република Македонија.

Годинава се одбележуваат 1144. години од смртта на сесловенскиот просветител Свети Кирил.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.