Општина Велес одлучи оваа година да не организира забава на плоштад за Нова година и да ги пренамени средствата за хуманитарна новогодишна акција. Како што информира градоначалникот Славчо Чадиев на денешната прес-конференција, за таа намена општината ќе издвои 120 илјади денари.
– Од Центарот за социјални работи побаравме информации за семејствата кои имаат најголема потреба од хуманитарна помош. Помошта ќе им ја донираме во пресрет на претстојните празници, најави Чадиев.
Информира дека во донацијата ќе се вклучат и вработените од општинската администрација кои со својот придонес ќе се обидат да ја збогатат празничната атмосфера на повеќе нивни сограѓани.
– Ваквиот позитивен пример се очекува да го следат и многу други институции низ државата кои со своите хумани гестови треба да покажат дека ранливите категории граѓани никогаш нема да бидат заборавени, потенцира Чадиев.
Општина Велес последниот организиран пречек на Нова година го организира во 2013 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
