Потрошувачите најчесто се жалат од неквалитетни производи, како бела техника, технички производи и производи во домот, и се повеќе доминираат јавните и финансиски услуги, додека бројот на поплаки останува околу три илјади во рамки на цела Македонија.
Тоа го посочи претседателката на Организацијата на потрошувачите на Македонија Маријана Лончар Велкова, во рамки на денешниот форум за унапредување на правата на потрошувачите.
– Сметаме дека треба многу да се работи на централно ниво на подигање на свеста на потрошувачите, но и на давателите на услуги за правата на потрошувачите. Да се донесе нов закон за заштита на потрошувачите, со цел да се унапредат правата таму каде што треба, како што е гаранцијата, означувањето на цената и други области кои не се соодветни и разбирливо уредени- рече Велкова.
Посочи дека граѓаните стануваат се посвесни за кршење на нивните права како потрошувачи, особено на територија на Град Скопје каде има 617 барања и извршени советувања, од кои 384 телефонски и 193 по електронска пошта.
– Поплаките од неквалитетни производи се 371, од кои 71 за бела техника, 120 за технички апарати и 65 за производи во домот. Специфични советувања во доменот на храната, а се повеќе доминираат и финансиските услуги- рече Лончар Велкова.
Истакна дека е неопходно јака организација, што ќе расне и со средства и со луѓе за да се докаже тоа што се случува преку истражувања, анализи и барање законски промени.
Претседателот на Советот за заштита на потрошувачите на Град Скопје Марјан Додовски, рече дека изминатата година во насока на тоа како потрошувачите да ги бараат и остварат своите права се изработени водич за користење на комунални услуги и две брошури за патување и домување.
– Имаме секојдневни побарувања и совети од потрошувачите. Многу често при користење на мобилни телефони доаѓа до нивно оштетување и тука се обидуваме да дадеме најреални и најточни сугестии како, што и дали можат да го остварат своето право- рече Додовски.
Посочи дека следната година посебен осврт ќе биде даден на остварување на правата на потрошувачите во делот на домувањето, затоа што живеењето во колективни згради си носи свои прави и обврски.
– Реакциите се од најразличен карактер, од поплаки во станбена зграда каде одредени станари чуваат домашни миленици, од нарушување на делот на кровните конструкции, поплавување, немање парно, расипани лифтови и кој тоа треба да го реши. Тоа се суштински работи за секое семејство и кога ќе се судри семејството се обраќаат до нас и ние се обидуваме на најреален начин да ги упатиме како да го остварат своето право- рече Додовски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
