Харден: Дајте му ја МВП награда на „брадата“ уште сега!

Во потесната листа за МВП наградата во НБА лигата оваа година го нема ниту Леброн Џејмс, ниту Стеф Кари. Стартот на сезоната е во знакот на Расел Вестбрук и Џејмс Харден, кои најмногу покажаа во првите два месеци од новата сезона.

Можеби јавноста го гледа Вестбрук како потенцијален победник поради просекот од трипл-дабл (31,2 поени, 10,5 скока и 11,3 асистенции), сепак во очите на Џејмс Харден, кој под палката на Мајк Д’Ентони игра како плејмејкер во Хјустон, тој е најголемиот фаворит за трофејот.

– Моментално би му ја дал наградата на „Брадата“. Погледнете го местото на нашата екипа. И секако бројките зад нашите настапи оваа сезона, кои се за историја. Погледнете ја мојата индивидуална статистика и се ќе ви биде јасно. Нашата цел оваа година е да го освоиме шампионатот. Новиот тренер за 20 натпревари ни покажа дека можеме да победиме секого. Ги победивме Сан Антонио и Голден Стејт на гостински терен, а блиску бевме и до славје во Кливленд. Останува уште многу да се игра, но мене искрено ми се допаѓа патот на кој што се наоѓаме – се зборовите на Харден, кој не штедеше на комплименти за себе и за своите соиграчи.

Доаѓањето на Д’Ентони значеше нова филозофија во нападот од која „жртвата“ беше заминувањето на Двајт Хауард и доаѓањето на Рајан Андерсон и Ерик Гордон. Тој е познат по својата офанзивна тактика, кој овозможува брза игра, многу шутеви за три поени и ефикасност на екипата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.