Вестбрук е неверојатен, нов трипл-дабл за победа над Вашингтон (видео)

Расел Вестбрук продолжува да доминира во дресот на Оклахома сити тандер, носејќи му на својот тим нова победа, овојпат над тимот на Вашингтон со 126-115, изборена дури по дополнителните пет минути. Извонредниот плејмејкер оствари уште еден трипл дабл, завршувајќи го мечот со 35 поени, 14 скокови и 11 асистенции, за нова радост на тимот од Оклахома кој сосема солидно се снаоѓа по заминувањето на Кевин Дурант. Ова беше четврти трипл-дабл во серија за Вестбрук, вкупно деветти сезонава, а асот на тандер воедно и испиша историја како само втор играч што влегол во месец декември со просек од трипл-дабл во поени, скокови и асистенции, правејќи му друштво на легендарниот Оскар Робертсон.

Сан Антонио се рехабилитираше по неочекуваниот пораз од Орландо, па спарси синоќа триумфираа на гостувањето протви Далас со 87-94. Пети Милс беше џокерот на тренерот Попович постигнувајќи 23 поени од клупата, два повеќе од Каваи Леонард.

Интересно беше и во Минесота, каде домашниот тим по голема борба загуби од Њујорк никс со 104-106. Кармело Ентони ги постигна поените за победа погодувајќи го решавачкиот шут на две секунди до крајот, а најефикасен кај никси беше Порзингис со 29 поени.

НБА резултати:

Чикаго – ЛА лејкерс 90-96, Минесота – Њујорк 104-106, Оклахома сити – Вашингтон 126-115 (по прод.), Торонто – Мемфис 120-105, Бостон – Детроит 121-114, Далас – Сан Антонио 87-94, Денвер – Мајами 98-106, Феникс – Атланта 109-107, Портланд – Индијана 131-109.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.