Британската телевизија „Канал 4“ испрати своја екипа во Велес за да ги најде младите велешани што на своите интернет-портали пласираа лажни информации во корист на Доналд Трамп. Светските медиуми пренесоа дека токму овие портали со лажни вести многу придонеле да се оцрни Хилари Клинтон и да се смени мислењето на американските гласачи.
Новинарот на британската телевизија допатувал во Велес и ја почнал потрагата по младите велешани. За негова среќа, тој успеал да дојде до неколкумина од нив. Сепак, повеќето од тинејџерите не сакаа јавно да зборуваат пред камерата за нивните страници и за заработките што ги добиле. Тоа што го дозна новинарот е дека заработката стигнала и до 200.000 долари, а во мрежата биле вклучени повеќе од 200 тинејџери.
Новинарот успеа да дојде и до еден од главните креатори на мрежата, но младиот велешанец не сакаше да зборува, негираше каква била вмешаност во креирањето портали со лажни вести и бргу замина со својот автомобил.
На прашањето зошто го правеле тоа, тинејџерите му рекоа дека целта им била пред сè да заработат пари, но и поради забава.
– Пари и забава, тоа е причината. Ако е веста лажна, ќе ја избришам, но пак ќе продолжам со порталот – му рекол еден од младите велешани на британскиот новинар.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
