Трипуновски: Тутунарството останува во приоритетите на ВМРО-ДПМНЕ

Цветан Трипуновски од ВМРО-ДПМНЕ зборуваше за значењето на производството на храна, но и директната зависност од стабилна извршна власт, која во моментов е неопходност.

Тој на средбите со тутунарите потенцираше дека подобриот квалитет на тутунот од годинашната реколта, значи и повисока цена за оваа традиционална култура во овој регион. Постојана е контролата од страна на институциите со цел да бидат заштитени тутунопроизводителите, односно правилно да биде вреднуван нивниот труд.

Во населените места Воѓани, Крушеани, Обршани и Бела Црква во општина Кривогаштани кои Трипуновски ги посети денеска, стана збор и за перспективите на ваквото производство за кое особено внимание посветува владеачката ВМРО-ДПМНЕ.

– На секој граѓанин му е јасно што значат релаксирани услови за живот и работа, кога енергијата нема да се троши на бесмилени, испровоцирани и наметнати односи од страна на СДСМ, наспроти избраните претставници од народот на последните парламентарни избори. Затоа, не треба да има никаква дилема: само 63 пратеници од ВМРО ДПМНЕ во идниот законодавен дом се вистинска гаранција за враќањето во нормален колосек и продолжување на патот на развојот – истакна тој.

– Добро може да се види што прави Владата, дури и во вакви услови, а потврда за бизнис условите дојде и до Светска банка, од Дуинг бизнис за високата десетта позиција на Република Македонија во светот. Земјоделството како особено значаен сегмент во тие рамки ќе добие уште подобри позиции, зашто продолжува поддршката за поголемо и поквалитетно производство на храна – истакна Трипуновски пред присутните на средбата во општина Кривогаштани.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.