Разврска во ГОБ: Болницата стапила во контакт со ужалените роднини

По демолирањето на Ургентниот центар на ГОБ „8 Септември“ од страна на толпа од триесетина мажи кои тешко ја поднеле веста дека кај нивни близок е констатирана смрт од болницата доцна вечерва стапиле во контакт со семејството на починатиот. Се договориле да отидат и да ги потпишат неопходните формулари дека не сакаат обдукција.

-Починатиот со возило на итната медицинска помош без знаци на живот бил донесен во болницата, потенцира директорот Сашо Стојчев и ги потврди информациите за инцидентот.

Тој потенцира дека немало атак на белиот мантил, односно дека лекарите и персоналот на болницата не биле нападнати. Починатиот бил насилно земен и однесен во непознат правец.

Роднините веднаш откако ја слушнале веста, почнале да расфрлаат и кршат се пред себе, по што насилно го зеле телото на 40- годишниот маж и го одвеле со возило без регистарски таблички. На заминување го скршиле стаклото од влезната врата во Ургентниот центар.

Увидот траел неколку часа во собата за реанимација, каде што толпата дивеела. Директорот д-р Стојчев информираше дека се прегледуваат и снимките од камерите во болницата. Повеќе детали за случајот се најавени за утре.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.