Напуштањето на седници на специјалната јавна обвинителка Катица Јанева ѝ стана пракса. Откако во понеделникот ја напушти собраниската седница на Комисијата за политички систем и односи меѓу заедниците, како што рече, поради мобинг и навредливи прашања од пратениците, денеска ја напушти и седницата на Советот на јавни обвинители, наведувајќи ја истата причина како образложение- мобинг од страна на обвинителите. Обвинителите пак сметаат дека Јанева е крајно непрофесионална, не си ги извршува своите обврски, не сака да одговара на прашања и не го почитува Советот.
Седницата на Советот на јавни обвинители Јанева ја напушти образложувајќи дека ѝ се врши мобинг и дека обвинителите ја прашувале за сè само не за извештајот, а веднаш откако излезе од салата, изјави дека е задоволна од начинот на кој течела седницата и во иднина се надева на поголема соработка со Советот на јавни обвинители.
За време на седницата Сулејманов не доби одговор на ниту едно прашање, зошто Специјаното обвинителство нема доставено општ и финансиски план за работење, ниту го објавува записникот за добиените материјали, колку советници има СЈО, зошто нема ниту една прес-конференција за преметот Пуч и колкава доказна вредност имаат материјалите кои ги предаде Заев.
Јанева ги избегна овие одговори со став дека прашањата на Сулејманов не се во интерес на извештајот за работењето на нејзиното обвинителство.
-Јас сум задоволна од начинот на кој комунициравме со Советот. Апсолутно сум изненадена од нивната заинтересираност за работата на СЈО и се надевам дека ќе ја продлабочиме самата соработка. Решија дека ќе дојдат да ги проследат просториите на СЈО каде што согласно нивните овласутвања ќе им бидат покажани и самите материјали кои ги имаме. Сметам дека личните навреди и вадењето од контекст од извештајот прашања, немам потреба да ги одговарам и затоа ја напуштив седницата. Но, сметам дека и самите членови на Советот кои заминаа од седницата не го оправдуваа начинот на кој постапуваше Зоран Сулејманов – рече Јанева по напуштањето на седницата.
Ниту пред членовите на Советот, Јанева не го образложи финансискиот дел од извештајот. Повикувајќи се на својата автономност накусо само рече дека таа одлучува кој и за колкава плата ќе работи во Специјалното обвинителство, а Советот нема право да ја прашува за трошоците. За аудиоматеријалите кои деновите протекоа во јавноста, Јанева рече дека поради многу работни обврски се уште не знае дали тие се дел од прислушуваните разговори кои ги поседува. Пред Советот Специјалната обвинителка се пожали дека останатите институции не соработуваат и побара поддршка за нејзиното барање да и се продолжи мандатот.
Утрово повторно беше одложена и седницата на собраниската комисија за политички систем. Според претседателот на комисијата Влатко Ѓорчев, додека Јанева не присуствува на седницата не се исполнети деловничките услови за расправа.
Членот на Советот, Зоран Сулејманов, смета дека Јанева е непрофесионална, не си ги извршува своите обврски и не сака да одговара на прашањата што тој ѝ ги поставува.
Тој додаде дека Јанева е неисполнителна и зборува само за тоа што таа сака да зборува и дека не покажува никакво почитување кон Советот.
Сулејманов на Јанева ѝ рече дека „некои работи ќе се обиде да ѝ ги објасни како што им објаснувал на неуките странки кои доаѓале кај него и се жалеле“, и подвлече дека рече Јанева ги исполнува условите Советот да побара нејзина смена.
-Иако на некои луѓе по неколкупати сум им објаснувал, едноставно не разбираат. Ним им велам дека доаѓаат во земјоделска аптека и сакаат да купат боза. Еве, на ист начин ќе се обидам и вам да ви објаснам и можеби ќе сфатите што сакам да кажам, истакна Сулејманов.
Јанева во понеделникот ја напушти и собраниската седница на Комисијата за политички систем и односи меѓу заедниците.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
