Над 2.500 лекари заминале на обука во странство, најновите методи од таму веќе се применуваат и во Македонија

Над 2.500 лекари досега заминале на обука во странство, а 70 проценти од нив методите кои ги научиле таму веќе ги применуваат во македонското здравство.

Според лидерот на ВМРО-ДПМНЕ, Никола Груевски, ова е многу значаен проект за државата.

– Имаме многу значајни проекти во делот на здравството како што е набавката на опрема или градбата и реновирање на болници и слично, но ова веројатно е најзначајниот затоа што овозможува стручниот кадар во Македонија да се надоградува и многу брзо да ги учи најновите методи откако тие ќе излезат во понапредни медицински центри во светот – истакна Груевски.

Оваа година, 500 лица заминаа на обука, а над 300 треба да заминат во преостанатиот дел од годината.

– Голем дел од нив заминуваат во Европа, Германија, Англија, Италија, Словенија, Холандија, а голем дел заминаа и во САД, еден дел во Азија, во Јапонија, во Кина, но најголем дел се концентрирани во Европа, особено во Германија и во Италија. Добро е што почна да се применува овој проект. Не знам зошто во минатото не се спроведувал, од почетокот на 90-тите година, ќе имавме многу повеќе методи во нашето здравство, ќе имавме многу поквалитетен медицински персонал – додаде Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.