Oд 1 до 4 октомври, во Кинотека на Македонија ќе се организира второто издание на филмскиот фестивал за музички документарни филмови „Скопје синема сити“.
„Скопје синема сити“ е филмски фестивал за музички документарни филмови основан во 2014 година. Тоа е мултимедијална платформа, која обединува сѐ на тема музика – од документарни филмови, изложби, па до промоции на книги и предавања. Минатата година фестивалот се отвори со изложбата на фотографии од Дејвид Боуви на реномираниот британски фотограф Брајан Рашиќ заедно со филмови за Боуви. На програмата имаше многубројни филмови и од домашна и од странска продукција и гости од Велика Британија и од Германија.
Оваа година фестивалот се организира во соработка со Кинотека на Македонија и во текот на четирите фестивалски денови, гостите ќе проследат многубројни музички филмови од различни жанрови и продукции. Како и првата година, така и оваа фестивалот ќе почне со осврт/трибјут кон некој уметник. Оваа година тоа е Леонард Коен и фестивалот ќе се отвори со филмот „Јас сум твојот човек – Леонард Коен“ на режисерката Лиан Лунсон. Фестивалот, исто така, соработува со „Би-Би-Си“ и ќе се прикажат многубројни филмови од нивната продукција. На програмата ќе се најдат и филмови од домашната продукција.
Во рамките на фестивалот ќе се промовира и книгата со музички интервјуа на организаторот на фестивалот Ненад Георгиевски, која ќе биде објавена од издавачот „Полица“. Книгата ќе содржи 40 интервјуа со странски музичари како Пет Метини, Дејвид Силвијан, Питер Хук и домашни музичари како Влатко Стефановски, Кирил Џајковски, Џијан Емин и „Љубојна“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
