Шкупи успеа да стигне до првата победа во новата сезона од Првата лига, совладувајќи го Пелистер на празниот „Чаир“ со 2-1. Победничкиот погодок беше дело на Димитрија Лазаревски во 90.минута од натпреварот.
Избраниците на Висар Ганиу први поведоа. Во 26.минута, Бесар Исени ја затресе мрежата на Пелистер и го доведе својот тим во водство од 1-0. Сепак, „зелените“ не се предадоа. На самиот старт од вториот дел, гостите израмнија со погодокот на Лукас Фереира Кардосо.
Шкупи бараше триумф во продолжението, а успеа да стигне до трите бода во самиот финиш. Лазаревски беше стрелец на погодокот за прв триумф во новиот шампионат.
По овој пораз, Пелистер и понатаму се наоѓа на третата позиција со 10 освоени бода, додека Шкупи е на седмото место, со пет бода на контото.
Останатите натпревари од шестото коло во Првата фудбалска лига на Македонија ќе се одиграат утре, со почеток од 15.30 часот, а се среќаваат: Вардар – Работнички, Шкендија – Македонија ЃП, Победа – Брегалница, Силекс – Ренова.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
