Пролетна распродажба на бодови во Италија, ниеден домаќин не победи на 10 меча

Фудбалско коло за „Рипли“, одиграа италијанските прволигаши, а на вкупно 10 натпревари, гостите заблежаа импресивни 8 победи со две нерешени средби. Честа на домашните екипи ја спасија Сампдорија со реми, 1-1, против Катанија и Торино во „очекувано“ миролјубив меч без голови со Џенова. Сите останати дуели завршија со победи на екипите што гостуваа.

Киево, вчера го најави колото на чудата со триумф над Рома (1-0) во Рим. Низата ја продолжи Милан со убедлив триумф во Пескара со 4-0, а серијата ја продолжија Јувентус, Наполи, Лацио, Фиорентина, Парма и Удинезе. Сите победија на гостински терен за биланс од 26 бода, наспроти само два за домашните екипи.

Горан Пандев, малку одмори по напорниот ритам, играше само 20-на минути за Наполи, но и без него второпласираната екипа во Калчото ја прегази Болоња. Хамшик, Кавани од пенал и Џемаили беа стрелци на головите за победа од 3-0. Пандев влезе во игра во 69. минута, кога мечот веќе беше решен.

Интересно беше на дербито меѓу Интер и Лацио во Милано. Гостите победија со 3-1, иако Интер пропушти доста шанси. Супер погодок постигна резервистот на Лацио, Онази, со бомба од 25 метри, а се посрамоти Рики Алварез од Интер. Аргентинецот, при резултат 1-2 промаши пенал, на смешен начин. Се лизна пред да упати удар, а топката заврши високо над голот на Лацио. Претходно токму Алварез беше стрелец на единствениот гол за Интер, а за Лацио прецизни беа Флокари, Ернанес и Онази.

Родригез, со погодок во 14. минута го одлучи дербито на Тоскана, во кое Фиорентина беше поуспешна од домаќинот Сиена. Идентични победи од 1-0 славеа и Јувентус кај Аталанта и Парма против Калјари. Удинезе со 3-2 го победи Палермо, па честа на домаќините ја спасуваа Сампдорија, со ремито 1-1 против Катанија и Торино, во натпревар без голови против Џенова.

Резултати: Пескара – Милан 0-4,  Болоња – Наполи 0-3, Интер – Лацио 1-3, Сиена – Фиорентина 0-1, Калјари – Парма 0-1, Палермо – Удинезе 2-3, Аталанта – Јувентус 0-1, Сампдорија – Катанија 1-1, Торино – Џенова 0-0. Вчера: Рома – Киево 0-1.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.