Турската армија и силите на меѓународната коалиција утрово почнале операција за протерување на ИСИС од сирискиот локалитет Јарблос кој граничи со Турција, објави кабинетот на турскиот премиер.
- Турските вооружени сили и воздухопловните сили на меѓународната коалиција почнаа воена операција за чистење на округот Јарблос во покраината Алео од терористичката организација ИСИС, пишува во соопштението.
Телевизијата НТВ објави снимки од мал број припадници на турските специјални сили кои влегле неколку километри на територијата на Сирија за да се осигура зоната пред можниот напад. Турските авиони Ф-16 го бомбардирале упориштето на џихадистите во Јарблос прв пат откако во 2015 година турски воен авион урна руски борбен авион над турско-сириската граница.
До границата се приближуваат и турски тенкови каде што заземаат позиции, а отворен е и топовски оган врз џихадистите, јавува Си-Ен-Ен Турк.
Јарблос е последната точка која ИСИС ја контролира на турско-сириската граница. Акцијата се случува на ден пред посетата на американскиот потпретседател Џо Бајден на Турција, каде треба да се сретне со премиерот Бинали Јилдерим, а потоа и со претседателот Реџеп Таир Ердоган.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
