Во селото Стајковци најголем дел од улиците и домовите се исчистени. Извршена е дезинфекција во над 85 проценти од домовите. Наскоро се очекува да започне и обештетувањето на граѓаните чии домови и имоти беа поплавени и уништени во невремето што на 6 август го зафати скопскиот регион.
Премиерот Емил Димитриев, кој денеска беше во посета на селата Стајковци и Инџиково и беше информиран од припадниците на Армијата за моменталната состојба на терен, истакна дека се работи за голема сума на средства што ќе треба да се исплати, но најважно е да им се помогне на граѓаните од поплавените подрачја.
– Сега работиме на исплатата на авансот. Многу луѓе немаат трансакциски сметки и како Влада го регулираме начинот како да го исплатиме авансот. Кога проценките ќе бидат конечни, како ќе стануваат валидни, така ќе бидат исплаќани средствата. Нема да се чека целосно да заврши проценката. Големи средства ќе бидат ангажирани од Буџетот, но мора да покажеме солидарност и разбирање за луѓето, истакна Димитриев.
Покрај премиерот Димитриев, на терен беа и министерот за одбрана и министерот за труд и социјална политика Зоран Јолевски и Диме Спасов, како и градоначалниците на Град Скопје и на општина Гази Баба, Коце Трајановски и Тони Трајковски.
Освен припадниците на АРМ, на терен работат и волонтери вработени во државните институции. Од 750 до 1.100 волонтери дневно им помогаат на граѓаните.
Во селото Инџиково, кое, исто така, беше погодено од невремето, направена е проценка на околу 370 куќи, а во текот на утрешниот ден или евентуално во четврток се очекува целосно да заврши. Направена е и дезинфекција во околу 260 куќи.
Жителите на Инџиково изразија благодарност до надлежните институции што пред извесно време ја направиле атмосферската канализација, која како што посочија, спречила да немаат поголеми штети.
– Да не беше канализацијата сите ќе бевме под вода, истакнаа жителите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
