Холанѓаните и Летонките се највисоки на светот, покажало истражувањето на лондонскиот „Империјал колеџ“ од 2014 година. Во претходното такво истражување, спроведено пред цело едно столетие, приматот им припаѓал на Швеѓаните. Но, тие денес се далеку од првото место.
Со просечна телесна висина од 183 сантиметри, Холанѓаните се дури 10 сантиметри повисоки од тоа што биле Швеѓаните пред еден век. Ист е случајот и кај жените. Летонките денес се во просек 10 сантиметри повисоки од Швеѓанките во 1914 година.
Најниските мажи на планетава, пак, со средна висина од 157,5 сантиметри, потекнуваат од Источен Тимор, иако сепак, нивниот просек е зголемен пет сантиметри во однос на истражувањето од 1914 година. Најниските жени, високи просечно 147 сантиметри, живеат во Гватемала.
Од нашето поблиско соседство, во листата на највисоките 10, односно највисоки мажи на шестото, седмото и осмото место, се жителите на Босна и Херцеговина (180,9 см), Хрватите (180,8 см) и Србите (180,6 сантиметри). Пред сто години, Босанците биле 19-ти, Хрватите 22-ри, а Србите 30-ти на листата.
Македонците не заостануваат премногу. Мажите пред сто години биле високи во просек 166,5 сантиметри, а денес – 178,3 сантиметри, што сепак не е доволно за да се најдеме во топ 10. Што се однесува до женската категорија, Македонките денес се високи во просек 159,8 сантиметри, што е за 10,2 сантиметри повеќе отколку пред сто години. 3а споредба, Србинките, кои во 1914 година биле на 93-то место, денес го заземаат петтото место со средна висина од 167,7 сантиметри.
Истражувањето опфаќа 200 земји во светот, а имало цел да ја покаже промената во висината кај мажите и жените од овие нации во интервал од сто години. Интересно е што најмногу „пораснале“ Иранците (за 16,5 сантиметри) и Јужнокорејките (за 20,2 сантиметри). Британците и Британките денес се повисоки за 11 сантиметри во однос на 1914 година, а пак, Американците и Американките се повисоки за 6, односно 5 сантиметри. Мажите Кинези се повисоки од пред сто години за 11 сантиметри, а жените 10 сантиметри.
Листа – мажи:
- Холандија
- Белгија
- Естонија
- Летонија
- Данска
- Босна и Херцеговина
- Хрватска
- Србиja
- Исланд
- Чешка
Жени:
- Летонија
- Холандија
- Eстoниja
- Чешка
- Србија
- Словачка
- Данска
- Литванија
- Белорусиja
- Украина
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
