Поранешниот македонски репрезентативец Перо Антиќ со својот Фенербахче се пласираше во финалето на плејофот во турскиот шампионат откако во полуфиналето славеше со 3-1 над градскиот ривал Галатасарај.
По лесните 2-0 во првите два меча на домашен терен, Фенербахче го загуби третиот натпревар на теренот на противникот, но не ја испушти втората меч топка вечерва и славеше пред празни трибини поради немирите на третата средба од полуфиналната серија со 82-75.
Галатасарај се покажа како тврд орев за избраниците на Жељко Обрадовиќ кои крајно мотивирани влегоа во овој дуел со желба за одмазда и изборување на мајсторка за два дена. По воведното водство на Фенербахче, Галата ја презема предноста и на полувреме замина со високи десет поени разлика (44-34).
Сепак во вториот дел квалитетот на Фенер исплива на површина и со ангажирана игра во одбраната полека но сигурно ја стопи предноста на домаќинот.
Одличните Удох и Весели го торпедираа противничкиот обрач, а Махмутоглу со својата четврта тројка на средбата го донесе и првото водство (63-65). Во наредните две минути домашниот состав воопшто не можеше да го пронајде патот до противничкиот обрач што Весели и Слукас го искористија за заедничка серија од 0-11 со која го зголемија водството на десет поени (65-75). Со пет минути преостанати на семафорот, домаќините немаа многу простор за маневрирање. Неискористените шанси резултираа со мал број на поени и пораз од 75-82.
Македонскиот интернационалец на паркетот помина 16 минути за кои запиша три поени зад своето име (0/1 за два поени, 1/4 за три поени) на кои придодаде и пет скокови.
Во финалето, Антиќ и соиграчите ќе се пресметаат со Анадолу Ефес.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
