Младиот македонски пијанист Арда Мустафаоглу го освои првото место на четвртиот меѓународен натпревар за пијано „Città di San Donà di Piave“, што се одржа од 17 до 22 мај во културниот центар „Леонардо да Винчи“ во Венеција.
Арда Мустафаоглу победи во конкуренција од 170 пијанисти од 30 држави. Жирито во состав: Константин Боџино, Масимилиано Џенот, Карло Гуаитоли Александар Вујуќ и Метс Видланд, едногласно му ја додели и специјалната награда „Невена Поповиќ“.
На завршниот концерт во театарот „Metropolitano Astra“, на Мустафаоглу му беше доделена наградата од публиката.
Арда е ученик во седмо одделение во Државниот музичко-балетски училишен центар „Илија Николовски –Луј“ од Скопје во класата на м-р Самира Мустафаоглу. Во неговата кратка пијанистичка кариера има многубројни настапи, концерти, освоени први награди, специјални награди и титула лауреат на државни и меѓународни натпревари во Македонија, Турција, Србија, Бугарија и Албанија.
На 9 јуни, заедно со македонската филхармонија Арда Мустафаоглу ќе и се престави на домашната публика со Моцартовиот пијано концерт бр. 21.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
