Словенечкиот производител на бела техника „Горење“ најави дека ќе почне со производство на велосипеди од марката „рог“ бидејќи од моменталнот приватен сопственик ќе го откупи правото на назив на брендот за повеќе од 40.000 евра.
Приватниот сопственик го откупил брендот од некогаш познатата љубљанска фабрика за велосипеди „Рог“, која во 2009 година заврши во стечај, а е подготвен да се откаже од правата на интелектуална сопственост за 41.500 евра.
- „Горење“ има знаење и искуство кое можеме да го употребиме за ревитализација на една од најпознатите словенечки индустриски марки“, изјави директорот на „Горење“, Фрањо Бобинац, потврдувајќи дека „Горење“ ќе започне да произведува велосипеди, пренесува „Деловен дневник“.
-„Горење“ во проектот за обнова на сјајот на старата марка словенечки велосипеди кои беа познати на просторите на поранешна Југославија влегува со љубљанскиот трговски центар БТЦ како партнер.
Првиот велосипед од новата генерација на пазарот ќе се појави во 2017 година. Најпрвин ќе се работи на модерна верзија на некогаш мегапопуларниот велосипед „пони“ од модерни материјали и со подобрена ергономија, а една година подоцна може да се очекува и велосипед за планинско и градско возење, како и електричен велосипед.
При крајот на 80-тите години од минатиот век фабриката за велосипеди „Рог“ произведуваше 300 до 350 илјади велосипеди годишно, но по распадот на заедничкиот југословенски пазар и евтиниот увоз од Далечниот Исток западна во тешкотии и пропадна.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
