Монографија за Есма Реџепова – Теодосиевска, која го носи епитетот кралица на ромската музика, беше промовирана синоќа во Музејот на македонската борба.
Автор на публикацијата е Славе Николовски – Катин, издавач е „Македонска искра“ и Асоцијацијата „Кралицата Есма и Стево Теодосиевски“ од Скопје. Објавувањето е поддржано од Министерството за култура, кое во 2013 година на Есма Реџепова – Теодосиевска ѝ ја додели титулата национален уметник.
– Оваа значајна монографија на своите 410 страници мошне импресивно и вешто ја овековечува одисејата на Реџепова, во форма на еден биографско-публицистички времеплов за 55 години на сцената на Реџепова-Теодосиевска и нејзиниот животен сопатник, истакнатиот музички уметник Стево Теодосиевски, изјави за медиумите министерката за култура Елизабета Канческа – Милевска, која присуствуваше на промоцијата.
Есма Реџепова-Теодосиевска во последните децении се етаблираше во сите европски и светски центри и ја промовираше македонската култура во меѓународен контекст.
– Во текот на своите 55 години активно музицирање, учествувала на врвни музички фестивали и манифестации низ светот, со што даде голем придонес во афирмирањето на македонската култура и традиција надвор од нашата држава. За време на својата 55-годишна кариера, Есма Реџепова-Теодосиевска има остварено повеќе од 12.000 солистички концерти во Република Македонија и надвор од неа. Во дискографијата на Есма Реџепова-Теодосиевска се наведени 15 албуми за домашни и странски продуцентски куќи, а остварила соработка со еминентни музички светски имиња. Ова ексклузивно издание покрај во Скопје ќе биде промовирано и во Кочани, Белград, Брисел, САД, Канада и Австралија, информира Министерството за култура.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
