За само неколку часа на почетокот на првиот продажен ден на билетите за големиот концерт на Енрике Иглесијас беа распродадени 30 отсто од целиот капацитет на салата „Борис Трајковски“. Овој рекорд на Шпанецот само го потврдува интересот на македонската публика за концерти на светски познати ѕвезди.
И не е само Иглесијас. Во Македонија следува навистина возбудлива концертна сезона.
Како главни одредувачи на тоа што добро ќе се слуша во живо и оваа година остануваат „Авалон продукција“, од каде што велат дека годинава со сигурност ја имаат најдобрата и историска концертна сезона.
– Доколку се соберат веќе најавените концерти, но и тие што се пред потврдување, овде и на Балканот, имаме околу 20 концерти – бројка што, навистина, воопшто не е за потценување – велат од продукцијата.
Концертната година почна со настапот на нашиот еминентен композитор и пијанист Дуке Бојаџиев и пријателите, кој многу брзо се распродаде, па на барање на публиката продукцијата успеа уште утредента да направи и втор концерт, кој, исто така, ја наполни „Метрополис арена“.
– Постојано ни пристигнуваат позитивни реакции. Тоа е нашата работа, впрочем, да работиме на тоа секогаш да носиме актуелни музички имиња и да ја радуваме нашата публика – велат „авалонци“.
Сега, со цел Скопје да биде европски центар, „Авалон продукција“ на 5 јуни го прави првото издание на „Скопје колинг 2016“ (Skopje Calling 2016) на Градскиот стадион, по примерот на сите светски метрополи. На фестивалот ќе гостува една од најголемите глобални ѕвезди на денешницата Дејвид Гета, а специјален гостин ќе биде германскиот суперстар диџеј Робин Шулц.
– Особено сме среќни што за првпат ни доаѓа и најголемата латинскоамериканска ѕвезда Енрике Иглесијас во Скопје, на 20 јуни, изведувач од А категорија, кој, навистина, не беше лесно да се донесе овде. Утредента, пак, на 21 јуни имаме и концерт на мегапопуларниот Џон Њуман –велат од продукцијата.
Покрај Скопје, „Авалон“ по неколку години повторно ќе работи во Охрид со странски изведувачи, што, според продукцијата, е доказ дека ова лето ќе биде, навистина, историско кога се во прашање нивните концерти.
Таму ќе настапат популарниот диџеј Ники Ромеро и легендарниот гитарист Ал ди Меола.
За Охрид, исто така, има потврдено уште две големи музички имиња, кои засега не сакаат да ги откријат.
– Тоа на што сакаме да дадеме акцент е што „Авалон продукција“ активно работи и на концертната сцена на Балканот. Во рамките на двата фестивала „Белград колинг“ (Belgrade Calling) и „Загреб колинг“ (Zagreb Calling), кои се исклучително успешни на овие простори ќе имаме концерти на Џон Њуман и на исклучителните „Симпли ред“. На 12 јули за првпат ќе работиме и во Љубљана со легендарните „Вајтснејк“, додека во Загреб во ноември ги носиме едни од најпопуларните алтернативни групи „Пласибо“ – велат од продукцијата.
Бидејќи станува збор за светски ѕвезди, нескромно речено, во пикот на нивната кариера, од „Авалон“ велат дека, навистина, е тешко да се донесе некој толку познат овде
– Тешко е во Скопје да се донесат музички ѕвезди, особено тие од А категорија. Македонија е мала држава и, навистина, ретко кој од тие музичари со веќе потврдено реноме се нафаќа да нѐ посети – велат од „Авалон“.
Меѓу другото, во Македонија не постојат официјални дистрибутери на нивните албуми, што, според продукцијата, прави голем проблем за нивната работа.
– Еве, ќе откриеме дека со Енрике и со Дејвид Гета преговаравме од септември 2015 година, за конечно, по пет месеци преговарање да ги потврдиме нивните концерти во Скопје. „Авалон продукција“ постојано работи на тоа Македонија да биде дел од светската музичка сцена, секогаш да носи актуелни музички имиња и никогаш нема да се откаже од тоа – велат тие.
Што се однесува до барањата на ѕвездите, од продукцијата велат дека секогаш има барања и секакви.
– Барања има секакви. Секој изведувач има различни барања и ние се трудиме најдобро што може да им ги овозможиме сите работи што ќе ги побараат. Се трудиме да им го направиме престојот во Македонија пријатен и да го запаметат по нашето гостопримство и професионално работење – велат тие.
Тоа што на повеќето изведувачи им е заедничко е почитта што сакат да ја покажат кон македонската публика.
– Интересно е што сакаат да го развеат македонското знаме пред македонската публика, често да ја изведат и националната химна. Тоа, навистина, е за голема почит – велат од „Авалон“.
Распоред на концерти
5 јуни – Дејвид Гета и Робин Шулц на „Скопје колинг“ на арената „Филип Втори“
20 јуни – Енрике Иглесијас во салата „Борис Трајковски“
21 јуни – Џон Њуман во салата „Борис Трајковски“
22 јуни – Џон Њуман на „Белград колинг“ на стадионот „Ташмајдан“ во Белград;
„Симпли ред“ на „Загреб колинг“ стадион „Шалата“ во Загреб
23 јуни – „Симпли ред“ на „Белград колинг“ на стадионот „Ташмајдан“ во Белград;
Џон Њуман на „Загреб колинг“ стадион „Шалата“ во Загреб
12 јули – „Вајтснејк“ во салата „Тиволи“ во Љубљана
1 август – Ники Ромеро во Охрид
13 август – Ал ди Меола во Античкиот театар во Охрид
10 ноември – 20 години „Пласибо“ во кошаркарскиот центар „Дражен Петровиќ“ во Загреб
Пишува: Марина Костовска
(Текст објавен во 191. број на неделникот „Република“, 29.04.2016)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
