Креаторката Елена Спасовска на штотуку завршениот моден викенд во Скопје ја претстави новата колекција „Стариот свет“, со која предизвика многу позитивни критики во јавноста. Таа е многу задоволна од својот настап. На својата ревија и со новата колекција покажа како ја гледа модерната жена. Нејзината колекција е за храбри жени, како што вели таа.
– Колекцијата е наменета за модерни жени, кои храбро комбинираат материјали, отпечатоци или текстура. Ваквата жена е сигурна во себе и сака да биде оригинална и урбана – вели Спасовска.
Со колекцијата Спасовска направи суптилен спој на спротивности. „Стариот свет“ е базирана на реалност и на фантазија, нежност и сила, спомени од детството и неизвесноста на иднината.
Таа има своја замисла како треба да изгледа модерната жена во Македонија.
– Според мене, модерната жена не ги следи слепо трендовите, туку знае секој нов тренд да го приспособи на својот стил. Модата треба да биде начин на кој се изразуваме себеси и својот начин на живот и рефлексија на околината врз нас – вели Спасовска.
Таа во оваа колекција работеше само со природни материјали – лен, памук, свила. – Сакав целата колекција да има дури органски изглед и затоа користев форми од природата, земјени бои и слоевитост во изразот. Внимавав на секој детаљ, дури и на најмалиот. Сакав секое парче облека да биде дел од оваа приказна и да ја раскаже колекцијата преку дванаесетте модели – раскажува Спасовска.
Висококвалитетните материјали се компонирани во скулптурно комплексни модели. Слоевитоста на облеката и комбинацијата на различни печати и текстури му даваат архитектонска вредност на секое парче.
Таа, лично, многу е задоволна од својот настап на „Модниот викенд“ во Скопје.
– Мислам дека годинава се појавија многу нови магазини и блогови за мода на интернет и сето тоа придонесе за голема покриеност на мојата ревија. Посебно сум задоволна и од начинот на восприемање на мојата ревија и од критиките од весниците, кои освен што беа позитивни, овој пат беа и конструктивни – смета Спасовска.
Овој моден викенд пролетва траеше од 1 до 14 април, поради големиот интерес на дизајнерите.
– Имам впечаток дека секоја нова сезона тимот на „Модната недела“ во Скопје станува сѐ попрофесионален. Сѐ уште сме далеку од светската модна сцена, но со сигурни чекори се приближуваме до неа – вели Спасовска, која третпат се претставува на модниот викенд во Скопје, а досега двапати учествувала на „Асембли дизајн фестивал“ во Грац, Австрија и неколкупати во Софија, Бугарија, во изложбениот простор на „ Иван Асен 22“.
Освен што е модна дизајнерка, таа соработува и со народниот театар во Куманово, како костимографка.
– Во минатата година работев на две претстави во тетовскиот театар и на една во кумановскиот театар, а веќе сме во подготовки за претставата „ Живот под кирија “ по текст на Рефет Абази и во режија на Лука Кортина, чијашто премиера е предвидена за јуни годинава. Работата како костимограф е поинаква во самиот концепт на создавање на костимот бидејќи треба да е врска меѓу целиот тим, а создавањето на колекцијата зависи само од мене. Тоа носи голема одговорност, но и предизвик, па затоа работата како дизајнер повеќе ме исполнува – завршува Спасовска.
Пишува: Александра Мазнева – Бундалевска
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
