Се вжештува трката за „Златна копачка“, Игуаин нова закана на Суарез

Продолжува неизвесната трка за престижната „Златна копачка“ во фудбалска Европа. На врвот на најдобри стрелци и понатаму е Луис Суарез, но во трката се врати и Гонзало Игуаин.

Откако пред десетина дена со два „покера“ (осум голови) го превзема првото место, Луис Суарез и овој викенд постигна гол и ја задржа предноста.

Меѓутоа, овој пат предноста од три гола не е во однос на Жонас и Кристијано Роналдо, кој не играше поради повреда, туку на повратникот Гонзало Игуаин.

Аргентинскиот напаѓач, кој паузираше три натпревари поради суспензија, ги постигна двата гола во победата на Наполи против Аталанта и ги надмина Роналдо и Жонас на втората позиција со 32 гола, три помалку од Суарез.

Секако, Игуаин да не беше суспендиран, многу веројатно е дека тој ќе беше лидер сега и главен претенденд за наградата најдобар стрелец во Европа. Сега му е отежната, но не и недостижна шансата во последните две кола од Серија А да го престигне Суарез.

Наполи гостува во Торино, а во последното коло го дочекува Фрозиноне, додека Барселона прво го дочекува Еспаљол, а последниот првенствен натпревар ќе гостува кај Гранада.

Во Топ 10 листата се врати Златан Ибрахимовиќ кој постигна два гола, по бројот на голови пред него е само Суарез, но Швеѓанецот со своите 34 погодоци се наоѓа дури на седмото место поради коефициентот на француската Лига 1, кој изнесува 1,5.

Покрај Роналдо и Жонас, во листата без промени од последниот викенд, без постигнат гол, се и Роберт Левандовски и Лионел Меси.

За потсетување, титулата за најдобар стрелец ја брани Кристијано Роналдо кој претходните две години ја освојуваше, а во случај да ја освои и оваа година ќе биде првиот фудбалер кому му успеало тоа три години по ред.

Исто така, Роналдо е и фудбалерот со најмногу освоени „Златни копачки“, ги има четири, една повеќе од Меси и освен нив ниту еден друг ја нема освоено повеќе од два пати.

Моменталната состојба во Топ 10 листата за наградата „Златна копачка“:

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.