Фиго за првпат отворено зборуваше за трансферот од Барселона во Реал Мадрид (видео)

Луис Фиго пет години беше идол на навивачите на Барселона, а последните 16 години, пак, е најомразениот фудбалер меѓу навивачите на каталонскиот тим.

Португалецот во 2000 година Барселона ја замени со Реал Мадрид, а навивачите на Барса тоа никогаш не му го простија. Две години подоцна на „Камп Ноу“ го дочекаа со незапаметени свирежи, гаѓајќи го со разни предмети, меѓу кои и свинска глава, пред секое негово изведување на корнерите.

Со години Фиго не разговараше со каталонските новинари, но конечно се согласи на одговор на прашањето: Дали е посреќен поради победата на Реал над Гетафе, или за поразот на Барса од Валенсија?

– Не уживам во туѓи приказни. Не сакам кога другите губат. Тоа нема мене да ме усреќи и да ме направи побогат во животот. Мојот живот не се врти околу Барселона или Реал – истакнал Фиго, притоа дополнувајќи:

– Јас немам ништо против Барселона, но каталонските медиуми имаат нешто против мене. Барселона ја напуштив поради спортско-финансиски причини, и фактот дека не добив доволно признание за мојот труд во клубот. А, на крајот испаднав најголем непријател.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.