Температурата на воздухот денеска и во наредните денови ќе достигне до 32 степена. За денеска од УХРМ најавуваат и висока вредност на УВ-индексот, седум. Поради невообичаената висока температура за овој период од годината, Министерството за здравство издаде препораки за населението.
Од Министерството за здравство посочуваат дека ненадејната изложеност на повисока температура, без претходна постепена адаптација, создава чувство на поинтензивна топлина слична на температурата во јули и во aвгуст и може да предизвика здравствени проблеми кај некои лица.
– За таа цел, се препорачува да се носи соодветна лесна облека, да не се престојува предолго на директна сончева изложеност, а хронично болните лица редовно да ја земаат пропишаната терапија – се вели во соопштението од Министерството за здравство.
Зголемување на облачноста и услови за слаб локален дожд се очекува утре попладне, а под влијание на северно воздушно струење дневната температура значително ќе опадне.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
